Gjendet një aparat shumë i vjetër fotografik, i përdorur nga "Piktori i Popullit", Vangjush Mio. Tashmë, aparati fotografik së bashku me një pjesë të mirë të koleksionit të veprave të artistit të njohur korçar zotërohen nga vajza e Vangjush Mios. Aparati mendohet të ruhet në shtëpinë muze të "Piktorit të Popullit", Vangjush Mio, por sipas vajzës së tij, Rozeta Mio, "shtëpia-muze, e shpallur e tillë që prej 40 vitesh, nuk ruhet në gjendjen e duhur". Vajza e piktorit thotë se dhe numri i vizitorëve nuk është i kënaqshëm. Vizitorët janë të pakët në numër dhe kryesisht janë të huaj ose të ardhur nga rrethet e tjera të vendit.
Krahas pikturës, fotografia ka qenë një pasion për Vangjush Mion dhe këtë e dëshmon dhe aparati që ai ka përdorur për të fiksuar në celuloid pamje të ndryshme dhe peizazhe të rajonit të Korçës. Mësohet se aparati i gjetur është përdorur nga Mio për shumë vite në "kooperativën" e fotografëve dhe më pas ai ka kaluar në duart e fotografit të vjetër korçar, që së fundi vendosi t‘ia dorëzojë atë vajzës së piktorit. "Piktori i Popullit", Vangjush Mio është një nga krenaritë e qytetit të Korçës. Qendra kulturore e qytetit mban emrin e tij. Në shtëpinë muze të piktorit ruhen 57 punime të tij të ekspozuara në studion e tij të punës dhe në dy dhoma të tjera, ndërkohë që rreth 62 punime të piktorit ruhen në Galerinë e Artit, në Korçë. Në muajin prill të vitit 1994, 21 piktura që ruheshin në shtëpinë e "Piktorit të Popullit" u vodhën për mungesë të sigurisë dhe ende nuk janë gjendur.
