Arti figurativ merr përmasa ndërkombëtare në qytetin e Korçës. Të paktën 45 piktorë të njohur vendas dhe të huaj janë bërë pjesë e një kolonie artistësh, të cilët duke nisur nga dita e djeshme e deri më 28 tetor do të jenë pjesë e ekspozitës ndërkombëtare kushtuar Vangjush Mios. Kolonia e radhës ka sjellë në qytetin e Korçës piktorë nga vende të ndryshme. Ata do të punojnë kryesisht peizazhe. Për aktivitetin ndërkombëtar "Ditët e Mios", 45 piktorët pjesëmarrës do të shpërndahen në zonat më piktoreske të Korçës, për të marrë nga natyra më të bukurën e kësaj zone. Të gjitha pikturat më pas do të prezantohen në një ekspozitë të përbashkët. Secili autor do t‘ia dhurojë veprën e vet qytetit. Është vendosur që të punohet më së shumti në peizazh, për vetë fakti se Vangjush Mio ishte nga ata piktorë që më shumë lëvroi në këtë gjini. Sipas drejtorit të qendrës kulturore, Vladimir Topi, janë të paktën 35 piktorë të mirënjohur nga vendi që kanë mbërritur dhe kanë nisur tashmë nga puna për të realizuar punimet e tyre artistike, ndërsa mes tyre janë edhe 15 piktorë të huaj, që kanë ardhur enkas për këtë aktivitet nga shtete si Bullgaria, Austria, Kosova, Maqedonia, Rumania, Greqia etj. Ata do të shëtisin thuajse në të gjitha vendet ku Vangjush Mio ka shkelur për peizazhet e tij. Boboshtica, Voskopoja, Dardha, por edhe Pogradeci e Drenova, Korça do të jenë vendet ku do të krijojnë piktorët pjesëmarrës.
