Një hapësirë ekspozuese ndryshe. Një shtëpi antikuarësh ku gjithçka i kushtohet artit të vjetër shqiptar. Punime të ikonografëve të njohur, ikona që datojnë nga shekulli i 13, enë të ndryshme dhe zbukurime në porcelan e qelq... Të gjitha këto janë ekspozuar në Shtëpinë e Antikuarëve në Korçë, falë nismës personale të koleksionistit Gjergji Thimio.
Pasioni, dëshira për t‘u njohur me të vjetrën, për ta ruajtur atë, pse jo edhe për ta pasur të vetën, e ka shtyrë Gjergji Thimion që vit pas viti të pasurojë koleksionin e tij. Koleksionimi i veprave të artit, (një rit gjithaq me origjinë antike) i shtyn jo rrallë persona të ndryshëm t‘i mbledhin e t‘i ruajnë këto objekte. Shpeshherë, arsyeja ka të bëjë me motive kulturore apo estetike. Koleksionistët i kushtojnë një pjesë të mirë të kohës kërkimit të objekteve të dashura. Hulumtojnë, deri sa bien në gjurmë të objektit. Pikësynimi është ta bëjnë për vete atë. Thuhet se koleksionistët formojnë një racë më vete: hobi që kanë i jep shije jetës, njihen dhe janë në kontakte të përhershme me objekte e njerëz që, në rrethana të tjera, as që do t‘i kishin njohur ndonjëherë. Asnjëherë nuk mërziten e shumë kohë ia kushtojnë studimit, gjetjes dhe blerjes së objekteve të reja. Të qenit koleksionist i mban gjallë. Marrëdhënia e tyre me rrënjët e së shkuarës është gjithnjë e fortë, pavarësisht kohës që shkon.
I tillë është edhe rasti i Gjergji Thimios, i cili ka vendosur që të gjithë këtë punë që, i ka kushtuar vite të tëra kërkimesh, ta ekspozojë për publikun. Ai ka vendosur që koleksionit të tij t‘i japë formë në një galeri të vizitueshme falas nga ata që preferojnë pjesën e vjetër të trashëgimisë sonë kulturore dhe të objekteve të përzgjedhura nga vitet dhe shekujt e kaluar. Shtëpia e Antikuarëve ka një fond të pasur me 150 punime të grumbulluara në vite, të cilat Thimio ka vendosur t‘i ekspozojë për publikun e gjerë. Kështu qytetit të Korçës, krahas Muzeut të Ikonave, i shtohet edhe një tjetër hapësirë ekspozuese e antikuarëve, edhe ato, pjesë e rëndësishme e trashëgimisë sonë kulturore. Vetë koleksionisti tregon se ka grumbulluar gjithsej 150 objekte, ikona të autorëve të njohur si Shpataraku, vëllezërit Zeografi, etj. Ikona më e vjetër e koleksionit të tij i takon shekullit 13, që është trashëguar nga një familje korçare.
Enë, punime në porcelan, fotografi të vjetra dhe piktura, orë dhe orendi shtëpiake, oxhakë por edhe orendi të tjera kanë shtuar fondin e pasur të koleksionit disavjeçar. "Të gjitha punimet janë rezultat i kërkimeve për të krijuar një koleksion të pasur. Prej vitesh, jam munduar që të grumbulloj një sërë ikonash, të cilat janë pasuria ime më e madhe. Një pjesë e mirë e koleksionit janë punime të ikonografëve të njohur korçarë dhe kanë vlerë të papërsëritshme. Të gjitha janë të miratuara nga ana e institucioneve përkatëse. Ato janë koleksionuar nga familjet që i kanë ruajtur, por edhe nga kërkimet personale", tregon Thimio. Për prefekten e Korçës, Efrida Zefi, kjo është e para galeri në vend e kësaj natyre, me ikona të vjetra dhe antikuarë të ruajtur me kujdes. Sipas saj, këto objekte sjellin një pjesë të rëndësishme të pasurisë dhe trashëgimisë sonë kulturore, në fondin e një muzeu të ri. Vetë koleksionisti tregon se mes ikonastaseve, më i vjetri daton në shekullin e 17. Ai thotë se kjo galeri është e hapur për vizitorët që janë kureshtarë të njihen me objektet shumëvjeçare, për ata njerëz që ashtu si ai kanë pasion për të njohur të vjetrën, artin e gjithçka lidhet ngushtë me të shkuarën. Ndërkaq mes objekteve të shumta nuk mungon as artizanati, enë të punuara me dorë, por edhe objekte të rralla që vijnë nga shtete të tjera. E tillë është edhe një ikonë me autor italian, si dhe portreti i Stalinit. Koleksionisti ka në plan të çelë së shpejti edhe muzeun e parë privat ikonografik. Sipas tij, për shkak se ikonat e vjetra nuk mund të ruhen në një galeri të tillë, ato do të mbahen në një vend të sigurt që të mos ketë dëmtime për shkak të ambientit. Deri më sot, ai i ka mbajtur në një vend të veçantë të gjitha këto objekte të rralla, për t‘u siguruar atyre ruajtjen nga agjentët e jashtëm. Herë pas here, ai edhe i ka ekspozuar ato në aktivitete të ndryshme kombëtare dhe ndërkombëtare. Në bashkëpunim edhe me Muzeun e Ikonave, këto punime janë restauruar për t‘i rezistuar kohës.
